Спаси и сохрани - Молитвы ангелу-хранителю

К тебе убо, яко многомощному предстателю и крепкому о нас молитвеннику, прибегаем мы, грешнии и недостойнии. Моли Благость Его, яко да отвратит от нас гнев Свой, праведно по делом нашим на ны движимый, и, презрев безчисленная прегрешения наша, обратит нас на путь покаяния и на стезе заповедей Своих утвердит нас. Огради молитвами твоими в мире живот наш, и во всем благом благое поспешение испроси, вся яже к животу и благочестию потребная нам даруя. Якоже древле Великий Новоград явлением чудотворныя иконы твоея от губительства смертнаго избавил еси, тако и ныне нас и вся грады и веси страны нашея от всяких напастей и бед и напрасныя смерти предстательством твоим избави и от всех враг видимых и невидимых покровом твоим защити. Яко да тихое и безмолвное житие поживем во всяком благочестии и чистоте и, тако в мире временное сие житие прешедше, в вечный достигнем покой, идеже сподобимся Небеснаго Царствия Христа Бога нашего. Емуже всякая слава подобает со Отцем и Пресвятым Его Духом ныне и присно и во веки веков. Аминь.

Молитва великомученику Феодору Стратилату

(21/8 февраля по старому стилю)

О святый, славный и всехвальный великомучениче Феодоре Стратилате! Молим тя пред иконою твоею святою: моли с нами и о нас, раб Божиих (имена), умоляемаго от Своего благосердия Бога, да милостивно услышит нас, благостыни у Него просящих, и вся наша ко спасению и житию нужная прошения да исполнит. Еще же молим тя, святый победоносче Феодоре Стратилате, разруши силы возстающих на ны врагов, видимых и невидимых. Умоли же Господа Бога, всея твари Создателя, избавити нас от вечнаго мучения, да всегда прославляем Отца и Сына и Святаго Духа и твое исповедуем предстательство ныне и присно и во веки веков. Аминь.

Молитва благоверному князю Всеволоду Псковскому

(24/11 февраля по старому стилю)

О, великий угодниче Божий и преславный чудо творче, святый благоверный княже Всеволоде-Гаврииле, града Пскова и всея державы Российския небесный заступниче и покровителю, и всех нас усердный пред Богом предстателю и защитителю! Предстоя Престолу Великаго Царя и Бога нашего, в Троице Святей славимаго и покланяемаго, велие дерзновение к Нему имати, яко верный раб Его и угодник. К тебе убо, яко сродному нам и многомощному пред Господем ходатаю, прибегаем мы, грешнии и недостойнии, и умиленно просим тя: моли Триединаго Бога, да отвратит от нас гнев Свой, праведно по делом нашим на ны движимый, и презрев безчисленная прегрешения наша, обратит нас на путь покаяния и спасения. Огради молитвами твоими в мире живот наш, и во всем благое поспешение и вся к животу и благочестию потребная нам даровати испроси; и якоже древле град твой Псков от пленения и разорения ратнаго избавил еси, тако и ныне и нас, и вся грады и веси страны нашея от всяких напастей и бед и внезапныя смерти предстательством твоим избави, и от всех враг видимых и невидимых покровом твоим защити. Сохрани молитвами твоими в мире державу нашу и буди всей стране Российстей крепкое ограждение; да тихое и безмолвное житие поживем во всяком благочестии и чистоте, и тако в мире временное сие житие прешедше, в вечный достигнем покой, и сподобимся Небеснаго Царствия, славяще Отца и Сына и Святаго Духа и твое святое заступление во веки веков. Аминь.

Тропарь блаженному Николаю Псковскому

(12 марта/28 февраля по старому стилю)

Словенска языка, Псковския земли плотски в юродстве быв, юродства притворением Горняго Иерусалима гражданин явися, ангелом, славне, свеселишися, мироточиваго святителя Николая звание стяжав, с нимже всегда Христа Бога моли даровати нам велию милость.

Молитва преподобному Алексию, человеку Божиему

(30/17 марта по старому стилю)

О, Христов угодниче, святый человече Божий Алексие! Призри милостивно на нас, раб Божиих (имена), и простри молитвенно ко Господу Богу честнии руце твои, и испроси нам от Него оставление согрешений наших вольных и невольных, мирную и христианскую жития кончину и добрый ответ на Страшнем суде Христове. Ей, угодниче Божий, не посрами упования нашего, еже на тя, по Бозе и Богородице, возлагаем; но буди нам помощник и покровитель во спасение; да твоими молитвами получивше благодать и милость от Господа, прославим человеколюбие Отца и Сына и Святаго Духа и твое святое заступление ныне и присно и во веки веков.

Тропарь и величание мученице Ларисе

(8 апреля/26 марта по старому стилю)

Тропарь святой мученице Ларисе

Агница Твоя, Иисусе, Лариса зовет великим гласом: Тебе, Женише мой, люблю, и Тебе ищущи страдальчествую и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою; но яко жертву непорочную приими мя, с любовию пожершуюся Тебе, Тоя молитвами, яко Милостив, спаси души наша.

Величание

Величаем тя, страстотерпице Христова Ларисо, и чтем честное страдание твое, еже за Христа претерпела еси.

Молитва преподобной Марии Египетской

(14 /1 апреля по старому стилю)

О, великая Христова угоднице, преподобная Марие! На Небеси Престолу Божию предстоящи, на земли же духом любве с нами пребывающи, имеющи дерзновение ко Господу, моли спасти рабы Его, к тебе с любовию притекающия. Испроси нам у Великомилостиваго Владыки и Господа веры непорочное соблюдение, градов и весей наших утверждение, от глада и пагубы избавление, скорбящим – утешение, недугующим – исцеление, падшим – возстание, заблуждшим – укрепление, в делах благих – преспеяние и благословение, сиротам и вдовицам – заступление и отшедшим от сего жития – вечное упокоение, всем же нам в день Страшнаго суда одесную страны общники быти и блаженный глас Судии мира услышати: приидите, благословеннии Отца Моего, наследуйте уготованное вам Царствие от сложения мира, и тамо пребывания во веки получити. Аминь.

Молитва преподобному Даниилу Переяславскому

(20/7 апреля по старому стилю)

О, преподобне и богоносне отче наш Данииле, всесмиренно к тебе припадаем и тебе молимся: не отступай от нас духом твоим, но всегда поминай нас во святых и благоприятных молитвах твоих ко Господу нашему Иисусу Христу: молися ему, да не потопит нас бездна греховная, и да не будем врагом, ненавидящим нас, в радование: да простит Христос Бог наш твоим предстательством за нас вся согрешения наша, и Своею благодатию водворит среди нас единодушие и любовь, и избавит нас от козней и наветов диавольских, от глада, губительства, огня, всякия скорби и нужды, от болезней душевных и телесных и от напрасныя смерти: да сподобит Он нас, притекающих ко святой иконе твоей, в истинней вере и покаянии пожити, христианския, непостыдныя и мирныя кончины живота нашего достигнути, и наследовати Царство Небесное, и славити пресвятое имя Его со Безначальным Отцем и Пресвятым Духом во веки веков. Аминь.

Тропарь преподобномученику Вадиму

(22/9 апреля по старому стилю)

В тебе, отче, известно спасеся еже по образу: приим бо крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней. Темже и со ангелы срадуется, преподобне Вадиме, дух твой.

Молитва преподобному Виталию Александрийскому

(5 мая/22 апреля по старому стилю)

О, священная главо, преподобне отче, преблаженне авво Виталие, не забуди убогих твоих до конца, но поминай нас всегда во святых и благоприятных молитвах к Богу: помяни стадо твое, еже сам упасл еси, и не забуди посещати чад твоих моли за ны, отче священный, за дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя: поминай нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися.

Не мним бо тя суща мертва: аще бо телом и преставился еси от нас, но и по смерти жив сый пребываеши, не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у престола Вседержителева предстоящи, достойно веселится, ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Аминь.

Молитва великомученику Георгию Победоносцу

(6 мая/23 апреля по старому стилю и 16/3 ноября)

Святый, славный и всехвальный великомучениче Христов Георгие! Собраннии во храме твоем и пред иконою твоею святою покланяющиися людие, молим тя, известный желания нашего ходатаю: моли с нами и о нас умоляемаго от Своего благосердия Бога, да милостиво услышит нас, просящих Его благостыню (имена), и не оставит вся наша ко спасению и житию нужная прошения, и да укрепит же данною тебе благодатию во бранех православное воинство, разрушит силы возстающих враг наших да низложит, да постыдятся и посрамятся, и дерзость их да сокрушится, и да уведят, яко мы имамы Божественную помощь; и всем в скорби и обстоянии сущим многомощное яви твое заступление. Умоли Господа Бога, всея твари Создателя, избавити нас от вечнаго мучения, да всегда прославляем Отца и Сына и Святаго Духа, и твое исповедуем предстательство ныне и присно и во веки веков. Аминь.

Тропарь святой мученице Александре

(6 мая/23 апреля по старому стилю)

Царства земнаго славу презревши, Единаго Хрис та, нас ради распятаго, возлюбила еси и, Того мужест венно исповедающи, венцем мученическим увенчалася еси, всеблаженная царице Александро. Темже и ныне Престолу Царя славы на Небесех предстоящи, молися о спасении душ наших.

Тропарь святителю Кириллу Туровскому

(11 мая/28 апреля по старому стилю)

Благочестия ревнителю и рачителю, иноков и столпников похвале, святителю Туровския паствы, преславне, златословесный учителю, светлым учением богоразумия своего просветивый концы русския, в молитве к Богу благодатный грешников споспешниче, Кирилле Богомудре, моли Христа Бога утвердитися нам, соотечественником твоим, во Православии, благочестии и единомыслии.

Молитва святой царице Тамаре

(14/1 мая по старому стилю)

О, святая царице Тамаро! Не забуди нас, но поминай во святых твоих молитвах раб Божиих, моли за ны, царице святая. Не отступи от нас духом, сохраняй нас от стрел вражиих, от прелести бесовския и козней диавольских. Испроси нам время на покаяние и невозбранно прейти от земли на небо чрез мытарства горьких бесов, да твоим предстательством от вечныя муки избавльшеся, Небесное Царствие наследовати сподобимся со всеми праведными, от века угодившими Христу Господу нашему: Емуже подобает всякая слава, честь и поклонение ныне и в безконечныя веки веков. Аминь.

Кондак святой великомученице Ирине

(18/5 мая по старому стилю)

Девства добротами преиспещрена дево, страдальчеством была еси краснейшая Ирино, кровьми твоими истекшими обагрена, прелесть же низложившая безбожия. Сего ради и прияла еси почести победы, рукою Создателя твоего.

Молитва святителю Алексию, митрополиту Московскому

(2 июня/20 мая по старому стилю)

О, пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Алексие! Предстоя у Престола всех Царя и наслаждаяся света Единосущныя Троицы и херувимски со ангелы возглашая песнь Трисвятую, велие и неизследованное дерзновение имея ко Всемилостивому Владыце, молися спасти люди паствы твоея, единородный ти язык, благостояние святых церквей утверди, архиереи благолепием святительства украси; монашествующих к подвигом добраго течения укрепи; град сей и вся грады и страны добре сохрани и веру святую непорочну соблюсти Господа умоли; мир весь умири, от глада и пагубы избави ны и от нападения иноплеменных сохрани нас; старыя утеши, юныя настави, безумныя умудри, вдовицы помилуй, сироты заступи, младенцы возрасти, плененныя возврати, немощствующия исцели и везде тепле призывающих тя и с верою притекающих ко святой иконе твоей, усердно припадающих и молящихся тебе, от всяких напастей и бед ходатайством твоим свободи, да зовем ти: о, Богоизбранный пастырю, звездо всесветлая мысленныя тверди, тайнаго Сиона необоримый столпе, миродохновенный цвете райский, всезлатая уста Слова, московская похвало, всея России украшение! Моли о нас Всещедраго и Человеколюбиваго Христа Бога нашего, да в день страшнаго пришествия Его от шуияго стояния избавит нас и радости святых причастники сотворит со всеми святыми во веки. Аминь.

Молитва равноапостольным Константину и Елене

(3 июня/21 мая по старому стилю)

О, предивнии и всехвальнии царие, святии равноапостольнии Константине и Елено! К вам, теплым заступником, возносим наши недостойныя молитвы, яко велие имате дерзновение ко Господу. Испросите у Него мир Церкви и всему миру благоденствие, начальником мудрость, пастырем попечение о пастве, пасомым смирение, старцем желанное упокоение, мужем крепость, женам благолепие, девственником чистоту, детям послушание, младенцем христианское воспитание, больным исцеление, враждующим примирение, обидимым терпение, обидящим страх Божий. Приходящим в храм сей и молящимся в нем святое благословение и всем вся по коегождо прошению полезная, да хвалим и поем Благодетеля всех Бога, в Троице славимаго Отца и Сына и Святаго Духа, ныне и присно и во веки веков. Аминь.

Молитва преподобному Никите Столпнику

(6 июня/24 мая по старому стилю)

О, всечестная главо, преподобне отче, преблаженне Никито преподобномучениче! Не забуди нищих твоих до конца, но поминай нас всегда во святых своих и благоприятных молитвах к Богу и не забуди посещати чад своих. Моли за ны, отче благий и избранниче Христов, яко имеяй дерзновение к Небесному Царю, и не премолчи за ны ко Господу, и не презри нас, верою и любовию чтущих тя. Поминай нас, недостойных, у Престола Вседержителева и не престай моляся за нас ко Христу Богу: тебе бо дана бысть благодать молитися за ны. Не мним бо тя мертва суща, аще бо и телом преставился еси от нас, но и по смерти убо жив пребываеши. Не отступай от нас духом, сохраняя и соблюдая нас от стрел вражиих и всякия прелести бесовския, заступниче и молитвенниче наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами у Престола Вседержителя Бога достойно веселится. Ведуще убо тя воистину и по смерти жива суща, тебе припадаем, и тебе молимся, и милися деем, еже молитися о нас Всесильному Богу о пользе душ наших, и испроси нам время на покаяние, и невозбранно прейти от земли на Небо, и горьких мытарств, и воздушных князей, и вечныя муки избавитися нам, и Небесному Царствию наследником быти со всеми праведными, от века угодившими Ему, Господу нашему Иисусу Христу. Емуже подобает всякая слава, честь и поклонение со Безначальным Его Отцем и Святым Духом ныне и присно и во веки веков. Аминь.

Молитва праведному Иоанну Русскому

(9 июня/27 мая по старому стилю)

О, святый новоявленный угодниче Божий Иоанне Русский! Подвигом добрым подвизаяся на земли, восприял еси на небесех венец правды, еже уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтем святую память твою. Ты же, предстояй престолу Божию, приими моления наша, раб Божиих (имена), и ко Всемилостивому Богу принеси, о еже простити нам всякое прегрешение и помощи нам стати противу козней диавольских, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков.

Молитва преподобному Арсению Коневскому

(25/12 июня по старому стилю)

О, всеблаженне и Богоносне Арсение, отче наш! Сый во славе Небеснаго Царя Христа Бога, предстоя Престолу Его со всеми Его святыми, не презри нас, долу сущих, грешных и недостойных, пред честной иконой твоей со слезами тебе молящихся, но приими сердечное стенание и бренных устен моление сие наше. Тебе бо вси молимся, о преподобне отче, и тебе умиленно просим: буди о нас ходатай и молитвенник теплейший ко Всеблагому Богу. Моли благость Его, еже спасти нас от прегрешений наших, имиже весть судьбами. Молися щедротам Его, еже подавати щедро граду сему и всему миру потребная. Молися Дающему всем мир низпослати мир церквам, собирая расточенныя воедино, сохранити землю Русскую в мире и тишине, и всем верным в доме, и на пути, и на мори, и повсюду дни благи и безмятежны даровати; благословити труды отцев и братий наших и простити всех согрешения вольная и невольная, яко да сподобимся и мы, грешнии, вкупе с тобою славити Отца и Сына и Святаго Духа в безконечныя веки. Аминь.

Молитва первоверховным апостолам Петру и Павлу

(12 июля/29 июня по старому стилю)

О, преславнии апостоли Петре и Павле, души за Христа предавшии и кровию вашею пажить Его удобрившии! Услышите чад ваших молитвы и воздыхания, сердцем сокрушенным ныне приносимыя. Се бо беззаконьми омрачихомся и того ради бедами, якоже тучами, обложихомся, елеа же добраго жития обнищахом зело и не возможем противитися волком хищным, иже расхищати наследие Божие дерзостно тщатся. О сильнии! Понесите немощи наша, не отлучайтеся духом от нас, да не разлучимся в конец от любве Божия, но крепким заступлением вашим нас защитите, да помилует Господь всех нас, молитв ваших ради, да истребит же рукописание безмерных грехов наших и да сподобит со всеми святыми блаженнаго Царствия и Брака Агнца Своего, Емуже честь, и слава, и благодарение, и поклонение во веки веков. Аминь.

Молитва святителю Филиппу, митрополиту Московскому

(16/3 июля по старому стилю; 22/9 января и 18/5 октября)

О, пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Филиппе! Предстоя у Престола всех Царя и наслаждаяся света Единосущныя Троицы и херувимски со ангелы возглашая песнь трисвятую, великое и неизследованное дерзновение имея ко Всемилостивому Владыце, моли спастися паствы Христовы людем, благостояние святых церквей утверди, архиереи благолепием святительства украси, монашествующих к подвигам добраго течения укрепи, царствующий град и вся грады и страны добре сохрани, и веру святую непорочну соблюсти умоли, мир весь умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, плененныя возврати, немоществующия исцели и везде тепле призывающих тя и с верою притекающих к тебе и усердно припадающих и молящихся от всяких напастей и бед ходатайством твоим свободи. Моли о нас Всещедраго и Человеколюбиваго Христа Бога нашего, да и в день страшнаго пришествия Его от шуияго стояния избавит нас и радости святых причастники сотворит со всеми святыми во веки. Аминь.

Молитва преподобному Антонию Печерскому

(23/10 июля по старому стилю)

О, добрый наш пастырю и наставниче, приснопоминаемый иноков русских первоначальниче, преподобне и богоносне отче наш Антоние! Ты горе на небеси, мы низу на земли, удаленнии от тебе не толико местом, колико греховною нечистотою нашей, обаче памятуя отеческую любовь твою к людем ти сродным, припадаем и молим ти ся со умилением и верою: помози нам, грешным, покаянием очиститися, и достойными быти помилования и прощения от Господа и Создателя нашего. Умоли Его благость даровати нам великия и богатыя милости: земли плодоносие, воздуха благорастворение, мир глубок, братолюбие искреннее, благочестие нелицемерное, житейских потреб довольство, и да не во зло обратим благая, даруемая нам от щедродательныя Его десницы, но во славу имени Его святаго и во спасение наше. Сохрани, угодниче Божий, предстательством твоим святым, в здравии и долгоденствии всех православных христиан и страну Российскую, покоряя под нози их вся враги и супостаты. Соблюди, чудотворче святый, благомощными твоими молитвами обитель твою и всю страну нашу невредимыми от всякаго зла, и вся люди, жительствующия в обители твоей, и на поклонение в ню приходящия, осени небесным твоим благословением, и в скорбех, бедах и болезнех утешение, избавление и исцеление им подаждь; да благодарно славим, хвалим и величаем прославльшаго тя Господа, чрез тебе дивно благодетельствующаго нам, Безначальнаго Отца, Единороднаго Его Сына и Единосущнаго Его Духа, Троицу Живоначальную и Нераздельную, и твое святое заступление во веки веков. Аминь.

Молитва равноапостольной княгине Ольге

(24/11 июля по старому стилю)

О, святая равноапостольная великая княгине Ольго, первоугоднице русская, теплая о нас пред Богом ходатаице и молитвеннице. К тебе прибегаем с верою и молимся с любовию: буди нам во всем ко благу помощница и споспешница и якоже во временней жизни тщалася еси просветити праотцы наша светом святыя веры и наставит я творити волю Господню, тако и ныне, в небесней пребывая светлости, благоприятными твоими к Богу молитвами, вспомоществуй нам в просвещении ума и сердца нашего светом Евангелия Христова, да преспеваем в вере, благочестии и любви Христове. В нищете и скорби сущия утеши, бедствующим подаждь руку помощи, обидимыя и напаствуемыя заступи, заблудшия вразуми, и испроси нам у Всещедраго Бога вся благая и полезная жизни временней и вечней, да тако благоугодне зде поживше, сподобимся наследия благ вечных в безконечном Царствии Христа Бога нашего, Емуже со Отцем и Святым Духом подобает всякая слава, честь и поклонение всегда, ныне и присно и во веки веков. Аминь.

Молитва равноапостольному князю Владимиру

(28/15 июля по старому стилю)

Како похвалим тебе, в земных владыках премужественный, Владимире? Како ти благодарение воздадим, яко тобою познахом Господа и лести идольския избыхом, яко твоим повелением по всей земли Христос славится? Како веровал еси? Како взыскал еси Христа? Повеждь нам, рабом твоим, откуду облагоуха тя воня Святаго Духа? Не видел еси Христа, не ходил еси по Нем, како ученик Его обретеся? Не видел еси апостола, пришедша в землю твою, не видел бесы изгоняюща именем Христовым, болящих исцеляюща, мертвых воскресающа. Дивное чудо! Инии царие и властителие, видяще вся сия, бывающа от святых муж, не вероваша, но паче на страсти и муки предаша их, ты же, о блаженне, не видя и не слыша всех сих, притекл еси ко Христу, разумев, яко Един есть Творец невидимым и видимым, Небесным и земным, и яко пос ла в мир, нашего ради спасения, Возлюбленнаго Своего Сына. И сия помыслив, вшел еси во святую купель. И ныне, тысящи летом и множае протекшим от Крещения Руси, призри на землю твою, виждь чада твоя. Виждь люди твоя, како живут, како храними суть Господом, яко благоверие хранят по преданию твоему, како славят Христа, како покланяются имене Его. Виждь и грады, величеством сияющия, виждь церкви цветущия, виждь христианство растущее, виждь и град твой Киев, толикими угодники Божиими, во нетлении почивающими, блистающийся и фимиамом облагоухаем, и хвалами и Божественными пении святыми оглашаем. И сия вся видев, возрадуйся и возвеселися и похвали Благаго Бога всем сим Строителя. Видя яко твое верное сеяние твоим ходатайством не изсушено бысть зноем неверия, но дождем Божия поспешения расположено бысть многоплодие, радуйся духом, во владыках апостоле, не мертвая телеса воскресивый, но душею ны, мертвыя, воскресив! Радуйся, утешителю наш и наставниче благоверия! Ты был еси, о честная главо, нагим одеяние, алчным кормитель, жаждущим утроб охлаждение, вдовицам помощник, странным покоище, обидимым заступник, убогим обогащение. Сим благим делом на Небесех возмездие приемля и зрения сладкаго Лица Божия насыщаяся, не престай моляся о земли твоей и о чадех, в нихже благоверно владычествовал еси, да славится в земли нашей выну правоверие и да не оставит нас Господь, аще и еще блуждаем, толиким веком протекшим, аще и еще согрешаем Господу и Владыце нашему, аки новокуплении раби, во всем неугодяще господину своему. К тебе руки наша воздеваем и молим тя: помолися Владыце всех, да продлит, дондеже стоит мир, милость Свою на отечествии нашем и людех Своих, ратная прогоняя, мир утверждая, глад угобзая, грады устрояя, Церковь Свою возращая, достояние Свое соблюдая, мужи, и жены, и младенцы спасая, да милостию Его носими, в единении веры вкупе весело и радостно славим Господа нашего Иисуса Христа со Отцем и со Пресвятым Духом, Троицу Нераздельную и Единобожественную, царствующую на Небесех и на земли, ныне и присно и во веки веков. Аминь.

Молитва преподобному Леониду Устьнедумскому

(30/17 июля по старому стилю)

О, священная главо, преподобне отче наш Леониде, земный ангеле и небесный человече, светильниче пресветлый, край наш Прилузский озаряяй! Тебе, угодниче Божий, неистощимое от Всеблагаго Владыки благодати и даров дадеся сокровище: с верою к тебе приходящих утешати, телесныя и душевныя недуги отгоняти. К тебе убо прибегаем, припадающе, молимся: не презри нас, молящихся и твоея просящих помощи. Испроси нам у Христа, да сотворит с нами знамение во благо и преобразит наше мрачное житие, сердце наше прокаженное очистит и обитель сотворит для Своего вселения, яко без Него не можем творити ничесоже, да всякое наше во благопожелание исполнит. Да тако, угождающе Ему, победим борющаго нас диавола, внидем идеже вси святии пребывают и прославляют Отца и Сына и Святаго Духа во веки. Аминь.

Кондак великомученице Марине

(30/17 июля по старому стилю)

Девства добротами преиспещрена дево, нетленными венцы венчалася еси Марино: кровьми же мученичества обагрена, чудесы просветившися исцелений, благочестно, мученице, прияла еси почесть победы твоего страдания.

Молитва пророку Илие

(2 августа/20 июля по старому стилю)

О, прехвальный и пречудный пророче Божий Илие, просиявый на земли равноангельским житием твоим, пламеннейшею ревностию по Господу Богу Вседержителю, еще же знамении и чудесы преславными, таже по крайнему благоволению к тебе Божию преестественно восхищенный на огненней колеснице с плотию твоею на Небо, сподобльшийся беседовати с Преобразившимся на Фаворе Спасителем мира, и ныне в райских селениих непрестанно пребываяй и предстояй Престолу Небеснаго Царя! Услыши нас, грешных и непотребных, в час сей предстоящих пред святою твоею иконою и усердно прибегающих к ходатайству твоему. Моли о нас Человеколюбца Бога, да подаст нам дух покаяния и сокрушения о гресех наших и всесильною Своею благодатию да поможет нам оставити пути нечестия, преспевати же во всяком деле блазе; да укрепит нас в борьбе со страстьми и похотьми нашими; да всадит в сердца наша дух смирения и кротости, дух братолюбия и незлобия, дух терпения и целомудрия, дух ревности к Славе Божией и спасению ближних. Упраздни молитвами твоими, пророче, злыя обычаи мира, паче же погибельный и тлетворный дух века сего, заражающий христианский род неуважением к Божественней православной вере, к уставом Святыя Церкве и к заповедем Господним, непочтением к родителем и властем предержащим, и низвергающий людий в бездну нечестия, развращения и погибели. Отврати от нас, пречудне пророче, предстательством твоим праведный гнев Божий и избави вся грады и веси Отечества нашего от бездождия и глада, от страшных бурь и землетрясений, от смертоносных язв и болезней, от нашествия врагов и междоусобныя брани. Укрепи твоими молитвами, преславне, предержащия власти нашя в велицем и многотруднем подвизе народоправления, благопоспешествуй им во всех благих деяниих и начинаниих к водворению мира и правды в стране нашей. Пособствуй христолюбивому воинству во бранех со врагами нашими. Испроси, пророче Божий, от Господа пастырем нашим святую ревность по Богу, сердечное попечение о спасении пасомых, мудрость во учении и управлении, благочестие и крепость, во искушениих, судиям испроси нелицеприятие и безкорыстие, правоту и сострадание к обидимым, всем начальствующим попечение о подчиненных, милость и правосудие, подчиненным же покорность и о послушании своем речение. Да тако в мире и благочестии поживше в сем веце, сподобимся причастия вечных благ в Царствии Господа и Спаса нашего Иисуса Христа, Емуже подобает честь и поклонение со Безначальным Его Отцем и Пресвятым Духом во веки веков. Аминь.

Тропарь святой мученице Христине

(6 августа/24 июля по старому стилю)

Званием евангельски Христу уневестившися, Христино славная, славу мира сего и похоть бренную вменила еси ни во что же, о самом телеси небрегущи, муки претерпела еси доблественно, тем твое страдание хвалами почитаем, мученице, Христу тезоименитая.

Молитва святым мученикам Борису и Глебу

(6 августа/24 июля по старому стилю)

О, двоице священная, братие прекраснии, доблии страстотерпцы Борисе и Глебе, от юности Христу верою, чистотою и любовию послужившии, и кровьми вашими яко багряницею украсившиися, и ныне со Христом царствующии!